انصارپرس: د ملګرو ملتونو سرمنشي انتونیو ګوتېرېش ویلي چې د ښځو حقونه د بشري حقونو یوه برخه ده او پر ښځو او نجونو پانګونه د غوره نړۍ د جوړولو تر ټولو ډاډمنه لار ده.

ګوتېرېش په خپله اېکس پاڼه کې لیکلی چې د ځينو پرمختګونو سره سره، په نړۍ کې د جنسیتي برابرۍ بهیر ټکنی او نابرابره روان دی.

ګوتېرېش د مارچ اتمې، د ښځو نړیوالې ورځې په مناسبت ویلي: «راځئ نړۍ د ښځو او نجونو لپاره بدله کړو.»

نوموړي ټينګار کړی چې د برابرۍ د ډاډمنولو لپاره د جدي اقدام وخت دی او نړۍ له بل هر مهاله ډېر د ښځو او نجونو حقونو او د مساوي فرصتونو برابرولو ته اړتیا لري.

د ملګرو ملتونو سرمنشي زیاته کړې چې ښځې او نجونې د نړۍ د بدلون په هڅه کې دي او له هغوی ملاتړ به د ټولنو په پرمختګ کې مهمه ونډه ولري.

دا په داسې حال کې ده چې د افغانستان په ګډون په ناورین ځپلو هېوادونو کې ښځې او نجونې له خپلو لومړنیو حقونو بې برخې او له سختو اقتصادي، سیاسي او ټولنیزو ننګونو سره مخ دي.