انصارپرس: د طالبانو مرستیال ویاند حمدالله فطرت ویلي چې د تورخم ښارګوټي پر یوه سوداګریز مارکېټ د پاکستاني پوځ په توغندیز برید کې د اورلګېدنې له امله سوداګرو ته 300 میلیونه افغانۍ زیان اوښتی دی.

فطرت د باختر خبري اژانس د یوه راپور په خپرولو ویلي چې د تورخم چارواکو ویلي چې دا برید پرون سهار شاوخوا څلور بجې شوی دی.

په تورخم کې د چارواکو په خبره، د اور د مهارولو لپاره څلور د اور وژنې موټرو، د ښاروالۍ د اوبو ټانکرونو او عامو خلکو پرلپسې هڅې وکړې، خو تر اوسه په بشپړ ډول نه دی کابو شوی.

د راپور له مخې، تر دې دمه د مارکېټ څه باندې 150 هټۍ سوځېدلې او عامو خلکو ته یې 300 میلیونه افغانۍ زیان رسولی دی.

فطرت ټينګار کړی چې دا لومړی وار نه دی چې پاکستان په تورخم او ځينو نورو سیمو کې عام ځایونه په نښه کوي.

دا په داسې حال کې ده چې د طالبانو او پاکستان ترمنځ ترینګلتیا او جګړه دوام لري او تر اوسه پکې لسګونو کسانو ته مرګ‌ژوبله اوښتي او زرګونه نور بې‌ځایه شوي دي.