انصارپرس: د طالبانو حکومت د بهرنیو چارو وزیر د ترکیې د بهرنیو چارو له وزیر «هاکان فیدان» سره د افغانستان او پاکستان ترمنځ د وروستیو نښتو په اړه ټلېفوني کړې دي.

د بهرنیو چارو وزارت د خبرپاڼې له مخې چې د دې اړیکې پرمهال مولوي امیرخان متقي ویلي چې د دوی حکومت له پیله د تاوتریخوالي پلوی نه دی او تل یې د تفاهم او متقابل درناوي پر بنسټ د ستونزو حل غوره کړی، خو ټینګار یې کړی چې مقابل لوری (پاکستان) دې هم د حل‌لارې لپاره عملي او صادقانه اراده وښيي.

د بهرنیو چارو وزیر همداراز ویلي چې د افغانستان امنیتي او دفاعي ځواکونو وروستي اقدامات د هېواد د حاکمیت، هوايي حریم او ځمکنۍ بشپړتیا د ساتنې په موخه ترسره کړي، چې ټاکل شوي اهداف یې په بریالیتوب ترلاسه کړي دي.

سرچینې لیکلي چې بلخوا د ترکیې بهرنیو چارو وزیر، هاکان فیدان د افغانستان سوله‌ییز دريځ د ستاینې ترڅنګ ویلي چې له اړوندو او همنظرو هېوادونو سره په اړيکه کې دی څو د وضعیت د ارامېدو او د تاوتریخوالي د کمېدو لپاره ګډې هڅې همغږي شي.