انصارپرس: د افغانستان لپاره د ملګرو ملتونو د بشري حقونو ځانګړی راپور ورکوونکی ریچارډ بېنټ وايي چې د طالبانو تګلارو د جنسیتي ځپنې نظام رامنځته کړی چې مخامخ د ښځو او نجونو روغتیا ګواښي.

بېنټ په خپل تازه راپور کې ویلي چې په افغانستان کې روغتیايي وضعیت تل د بېوزلۍ، جګړې، بې‌ ثباتۍ او خدماتو د کمښت تر اغېز لاندې و، خو اوس جنسیتي نابرابري د ښځو د روغتیا د کمزوري کېدو پر مهم عامل اوښتی دی.

نوموړي زیاته کړې چې طالبانو پر افغانستان له بیا واکمنېدو راوروسته د نرواکو کلیشو پر بنسټ ایډیولوژیک جوړښت رامنځته کړی چې موخه یې د ښځو د ونډې او واک محدودول دي.

بېنټ ویلي چې دا محدودیتونه د تبعیضي فرمانونو، جبر، تاوتریخوالي او ټولنیز کنټرول له لارې پلې کېږي او د ده په ټکو، دا د ښځو پر فزیکي او رواني روغتیا مستقیمې اغېزې لري.

په راپور کې ټینګار شوی چې په تدریجي توګه د ښځو د خپلواکۍ له منځه وړل، روغتیايي خدماتو ته د هغوی لاسرسی کم کړی او په افغانستان کې یې میلیونونو ښځو او نجونو ته د بقا جدي ګواښونه رامنځته کړې دي.