انصارپرس: د روسیې د بهرینو چارو وزارت ویاندې ماریا زاخاروا ویلي چې د جیفري اېپسټين اسناد ښيي چې «سپین سترګو او کرکجنو کسانو» کلونه د روسیې په اړه افسانې جوړولې څو له خپلو جنایتونو د خلکو پام واړوي.

ټاس خبري اژانس راپور ورکړی چې زاخاروا د روسیې پر وړاندې ګڼو تورونو ته اشاره کړې او ویلې یې دي چې دغه هېواد د «دلایلو او حقایقو» په وړاندې کولو له دغو تورونو سره مقابله کړې ده.

نوموړې ټينګار کړی چې دغو کسانو د لویدیځې نړۍ په زړه لکه د نیویارک، لندن او نورو اروپايي پلازمېنو او امریکا په تر ټولو لوکسو سیمو کې ځالې جوړې کړې وې.

زاخاروا زیاته کړې چې د اېپسټين په اسنادو کې ښکېلو کسانو په بېلابېلو جرمونو لکه فساد، انساني قاچاق، جبري فحشا، ناحقه زندانونو او ماشوم ځورونې کې لاس درلود.

د روسیې د بهرنیو چارو وزارت ویاندې ویلي چې د اېپسټين اسناد ښيي چې مجرمان او «واقعي انسان خواړه» په غربي ټولنو کې ازاد او راحته وو او هڅه یې کوله چې خپل جنایتونه پټ وساتي.