انصارپرس: د ملګرو ملتونو د بشري استوګنې پروګرام وايي چې په 2025 کال کې له 31 زره ډېر کسان د ناڅاپي سېلابونو له امله زیانمن شوي دي.

دغه پروګرام پنجشنبه د سلواغې پر 30مه، په یوه پیغام کې زیاته کړې چې دغه کسان د هېواد په 28 ولایتونو کې اغېزمن شوي دي.

د ملګرو ملتونو د بشري استوګنې پروګرام په وينا، په افغانستان کې اقلیمي ټکانونه مخ پر زیاتېدو دي.

دغه پروګرام ټینګار کړی چې بيخ بنسټونه باید د اقلیمي پېښو پر وړاندې د مقاومت وړتیا ولري.

دغه پروګرام زیاته کړې: «د پېښو پر وړاندې د مقاومو بيخ بنسټونو د جوړولو لپاره زموږ هڅې په سیمه کې پايېدونکی او څرګند اغېز پرېږدي.»

د ملګرو ملتونو بېلابېلو ادارو خبرداری ورکړی چې په افغانستان کې اقلیمي بدلون د هیواد پر بشري ناورين نور هم منفي او ویجاړوونکی اغېز زیات کړی دی.