انصارپرس: د کلیو بیارغونې او پراختیا وزارت د ننګرهار په «غني‌خېلو» ولسوالۍ کې د 5٫7 میلیون افغانیو په لګښت د څښاک پاکو اوبو یوې شبکې له جوړېدو خبر ورکړی دی.

به گزارش انصارپرس، د دغه وزارت په وېبپاڼه لیکل شوي چې دا شبکه د غني‌خېلو ولسوالۍ په «ګولایي نواباد» سیمه کې ګټې‌اخیستنې ته سپارل شوې ده.

په خبرپاڼه کې راغلي چې د دې شبکې د چارو پرمهال لسګونه کسانو ته د کار زمینه برابره شوې وه او 200 کورنیو د څښاک پاکو اوبو ته لاسرسی موندلی دی.

د کیلو بیارغونې او پراختیا وزارت ویلي: په یاده شبکه کې د 20 مترمکعب په وړتیا د پاکو اوبو یوې ذخیرې جوړول، د یوې ژورې څاه کیندل، د 3،8 کیلومترو په اوږدوالي پایپ غځول، د 135 نلکو او 14 لمریزې برېښنا تختو نښلول شامل دي

په خبرپاڼه کې دا نه دي ویل شوي چې د اوبو رسولو دا شبکه د چا په مالي ملاتړ جوړه شوې ده.

په ورته مهال د یادې سیمې اوسېدونکو د دې پروژې پر بشپړېدو خوښي ښودلې او له اسلامي امارت یې غوښتي چې هلته دا ډول نورې پروژې پلې کړي.

د یادولو ده چې دا مهال د پلازمېنې کابل په ګډون په ډېرو سیمو کې د څښاک پاکو اوبو ته لاسرسی سخت شوی دی.