انصارپرس: د طالبانو اطلاعاتو او کلتور وزارت وایي چې په هېواد کې د رسنیو او خبریالانو د ملاتړو بنسټونو هراړخیزه ارزونه شوې چې په پایله کې یې یوازې دریو بنسټونو ته د فعالیت اجازه ورکړل شوې ده.

د دغه وزارت د خبرپاڼې له مخې چې دا ارزونه د خبریالانو او رسنیو د پرله‌پسې شکایتونو وروسته شوې او څرګنده شوې چې ډېرو دغو بنسټونو د مسوولینو غیرمسلکیتوب او د خبریالانو او رسنیو د ستونزو د حل پرځای هغوی ته لا ډېرې ستونزې زیږولې وې.

د خبرپاڼې له مخې چې دغو بنسټونو په نړیواله کچه د افغانستان د رسنیو نهادونو باور ته زیان رسولی و او یو شمېر یې له څه مودې راهیسې غیرفعال وو.

«پورتنیو مواردو ته په کتو د اطلاعاتو او کلتور وزارت رهبرۍ پرېکړه کړې چې د هېواد په کچه یوازې د دریو نهادونو جوازونه تمدید او د پاتې نهادونو جوازونه لغوه کړي.»

د طالبانو حکومت اطلاعاتو او کلتورو وزارت همداراز ویلي چې یاده پرېکړه به له یوې خوا د خبریالانو او رسنیو د حقوقو تامین سربېره د خبریالانو او رسنیو په نوم د ناوړه ګټې‌اخیستنې مخه ونیسي، له بلې خوا به د نهادونو فعالیتونه ګټور او منظم شي او د هغوی باور به وساتل شي.