انصارپرس: ( دمرغومی19مه)، کابل ښاروالي وايي چې له ګلباغ پله څخه تر چهل‌دختران سیمې پورې د ګلباغ سړک د درېیم فاز د بنسټیزو برخو د جوړولو چارې پیل شوې، او د راتلونکي کال په لومړۍ میاشت کې به قیر کولو ته چمتو شي.

د خبرپاڼې له مخې چې د سړک جوړولو په دې پروژه کې 5٬314 متر اوږدوالی او 33 متره سوړ لري، د 14٬000 متر مکعب استنادي دیوال، لښتیو، پلیولارو، ګلدانونو جوړول، د څراغونو نصبول، په سړک د کرښو اچول او دیوه معیاري سړک نور جزئیات هم شامل دي.

کال ښاروالۍ ویلي چې د ګلباغ سړک د کابل ښار له مهمو اقتصادي دهلیزونو څخه شمېرل کېږي، لوېدیځ زون د ښار له سویل سره نښلوي او په جوړېدو سره به یې ترافیکي ګڼه ګوڼه د پام وړ کمښت ومومي.

کابل ښاروالۍ یوازینۍ اداره ده چې د طالبانو له بیاځلي واکمنېدو وروسته یې د ښار په بېلابېلو برخو کې رغنیزې چارې په چټکۍ پیل کړې دي او له تېرو څلورو کلونو راهیسې بېلابېل سړکونه جوړ او ګټې‌اخیستنې ته سپارل شوي دي.

د یادولو ده چې دا مهال د کابل په برکي څلورلارې کې هم د پُل جوړولو چارې هم پیل شوې دي.