انصارپرس: ( دلیندی4مه)، د طالبانو حکومت ویاند ذبیح الله مجاهد د څرګندونو له مخې؛ تېره شپه شاوخوا یوه بجه د خوست ولایت د ګربز ولسوالۍ په مغلګي سیمه کې د ولایت خان د زوی قاضي میر نومي ځايي اوسېدونکي پر کور د پاکستان د ځواکونو له‌خوا هوايي برید ترسره شوی دی.

په دې پېښه کې 9 ماشومان (پېنځه هلکان او څلور نجونې) له یوې ښځې سره یوځای شهیدان شول او تر برید لاندې کور بشپړ ویجاړ شو.

مجاهد دا هم ویلي، چې په کونړ او پکتیکا ولایتونو کې هم ورته هوايي بریدونه شوي، چې په پایله کې یې څلور ملکي وګړي ټپیان دي.

سیمه‌ییز چارواکي وايي، چې د پېښې ځای ته د څېړنو او پلټنو ډلې استول شوي او نور جزئیات به د څېړنو له بشپړېدا وروسته خلکو ته وړاندې شي.