انصارپرس: (د لړم 26مه)، د خیبرپښتونخوا اعلي وزیر سهېل افریدي د پاکستان حکومت تورن کړ چې په خپلو لاسونو رامنځته شوې ناامنۍ ته قصداً لمن وهي.

افريدي وویل چې د حکومت له لوري د پښتون ژغورنې غورځنګ (PTM) هغو غړو تښتول چې «د خیبرپښتونخوا د سولې جرګې» لپاره راغلي وو، د سولې د هلوځلو او له افغانستان سره د بیا پیل شویو خبرو د ګډوډولو یوه هڅه ده.

هغه زیاته کړه: «هغه ذهنيت چې په تېرو 71 کلونو کې په پاکستان کې حاکم پاتې شوی او هېڅکله یې په خیبر پښتونخوا کې سوله نه غوښتله، زموږ د مېلمنو په تښتولو سره یې ثابته کړه چې دا ټوله ترهګري په مصنوعي ډول جوړه شوې او دروغجنه کیسه ده. دوی سوله د خلکو د ارادې پر ځای د خپلو ګټو له مخې تنظیموي.»

افریدي مخکې تر مخکې په پښتني سیمو کې د پاکستان پوځي عملیات سخت وغندل او ویې ویل چې پوځ د ترهګرۍ پر ضد د مبارزې په پلمه بې‌ګناه ملکي وګړي په نښه کوي او جنگي جرمونه ترسره کوي.

هغه وویل خلک د مرکزي حکومت له پټو پرېکړو او په قبایلي سیمو له تپل شويو تګلارو ستړي شوي دي او اعلان یې وکړ چې «دې تپل شويو چلندونو ته به تسلیم نه شي.»

د خیبرپښتونخوا اعلی وزیر په څرګنده وویل: « د خیبر پښتونخوا خلک له دې جعلي ترهګرۍ او له هغو پټو پرېکړو ستړي شوي دي چې کلونه کلونه پر موږ تپل کېږي. زه نن په ښکاره وایم: لکه څنګه چې زما مشر عمران خان درسره هېڅکله سر نه دی کښته کړی، زه هم نه کږېږم. هر څوک چې زموږ سوله خرابوي، زموږ ګډ دښمن دی. هر څوک چې زموږ مذهبي ارزښتونو ته سپکاوی کوي، زموږ ګډ دښمن دی. او دوی باید پوه شي چې موږ به هېڅکله تسلیم نه شو.»

دا انتقادونه په داسې حال کې ډېر شوي چې د افغانستان د طالبانو حکومت هم د پاکستان د پوځ یوه ځانګړې کړۍ تورنه کړې چې هڅه کوي د کابل او اسلام‌اباد ترمنځ اړیکو ته زیان ورسوي.

په همدې حال کې د خیبرپښتونخوا او ننګرهار سوداګرو ویلي چې پاکستان له افغانستان سره د لارو په بندولو د ډیورند کرښې د دواړو خواوو خلکو او سوداګرو ته زیان اړوي.

دوی د پاکستان له حکومته وغوښتل چې سوداګري لارې له سیاست او نورو مسلو سره ونه تړي او تضمین ورکړي چې لارې به د سیاسي فشار د وسیلې په توګه نه کاروي.