انصارپرس: ( د لړم 15مه)، ننګرهار کې له پاکستانه د یوې تازه راستنې شوې افغان کډوالې کورنۍ بار موټر اوښتی، چې له امله یې 5 کسان ژوبل شوي دي.

پېښه د پچیرآګام ولسوالۍ د کوز صبر په چینارګي سیمه کې شوې، چې 4 ښځې او یو سپين ږیری سړی پکې ژوبل شوي دي.

د معلوماتو له مخې، دغه کورنۍ تازه له پاکستانه راستنه شوې وه، چې خپل اصلي ټاټوبي ته پر لاره وه.

ننګرهار کې د طالبانو ولایتي چارواکو د پېښې په اړه څه نه دي ویلي، خو ځايي خلکو یادې کورنۍ سره د مرستې غوښتنه کړې ده.

دوی زیاتوي، چې له دغې کورنۍ د کور نیمايي توکي پاکستاني پولیسو ایسار کړي او را اړولې برخه یې د موټر اوښتو له امله زیانمنه شوې ده.