انصار: ( د لړم لومړۍ نېټه)، د طالبانو حکومت د کډوالو او راستنیدونکو چارو وزیر، مولوي عبدالکبیر د افغانستان لپاره د بریتانیا له ځانګړي استازي «ریچارډ لینزي» سره کتلي دي.

د کډوالو او راستنیدونکو چارو وزارت نن (پنجشنبه، د لړم لومړۍ نېټه) په خبرپاڼه کې ویلي چې په دې کتنه کې ریچارډ لینزي د افغانستان او پاکستان ترمنځ له اوربند هرکلی کړی او هیله یې څرګنده کړه چې کابل او اسلام آباد به د دایمي اوربند لپاره همکاري وکړي.

د افغانستان لپاره د بریتانیا ځانګړي استازي هم د طالبانو حکومت له خوا له اړمنو سره مرستې او د هغوی د ستونزو پر وخت حل کول یو بریالیتوب بللی او ویلي یې دي چې هېواد یې د افغانستان په ختیځ کې له زلزله‌ځپلو سره د مرستې لپاره څلور میلیون پونډه ځانګړي کړي دي.

ریچارډ لینزي ټینګار کړی چې بریتانیا به له افغانانو سره خپلې بشري مرستې ته دوام ورکړي.

بلخوا مولوي عبدالکبیر ویلي چې د دوی حکومت د افغان کډوالو او اړمنو خلکو د ملاتړ لپاره له خپلو ټولو امکاناتو څخه کار اخلي، او په وینا یې چې له راستنیدونکو کډوالو سره د لنډمهاله مرستو سربیره، د دوی د دایمي سرپناه لپاره یې څو استوګنځایونه په پام کې نیولي دي چې د جوړولو کار یې روان دی.