انصار: (د زمري ۸مه)، بامیان ولایت کې د طالبانو د امنیې قومندانۍ مسؤلان وايي، د دغه ولایت د یکاولنګ ولسوالۍ په باک کوتل سیمه کي د یوې ترافیکي پېښي له امله یوه ښځه مړه شوې او ۱۴ تنه نور ژوبل شوي دي.
د یادي قومندانۍ ویاند محمد خواني رسا وایي، دغه ترافیکي پېښه پرون (سه شنبه) سهار ۱۰ بجې له سړک څخه د یوه فلانکوچ موټر د اوښتو پر مهال رامنځ ته شوې.
سرچینه د پېښې د رامنځته کېدو لامل د موټر چلوونکي بې احتیاطي یادوي.
د رسا په وینا، ژوبل کسان د درملنې لپاره د دغه ولایت روغتون ته لېږدول شوي دي.
دغه پېښه داسې مهال رامنځته کېږي چې، تېره دوشنبه د غزني ولایت په قره باغ ولسوالۍ کې د کابل- کندهار پر لویه لاره هم د بې احتیاطۍ له امله په یوه ترافیکي پېښه کې شپږ کسانو ژوند له لاسه ورکړ او ۳۱ تنه نور ژوبل شول.
د نظر خاوندان په افغانستان کې د ترافیکي پیښو د زیاتوالي عمده لاملونه د موټرچلونکو ناپوهي، د ترافیکي قوانینو نه مراعت، خراب سړکونه، تخنیکي نیمګړتیاوې، او د نظارت کمزوری سیستم یادوي.
