انصار:( د چنګاښ ۲۳مه)، د اطلاعاتو او کلتور وزارت مسوولینو په دې وروستیو کې اعلان وکړ، چې له دې وروسته به په افغانستان کې چاپ شوي کتابونه له مالیې معاف وي.

د اطلاعاتو او کلتور وزارت د خپرونو مرستیال، مهاجر فراهي په خپل ایکس پاڼه کې لیکلي چې دا د طالبانو د رهبر د فرمان پر بنسټ ترسره شوی دی. د هغه په وینا، د امارت د رهبر د فرمان پر بنسټ، په افغانستان کې چاپ شوي کتابونه له مالیې معاف دي.

فراهي زیاته کړه چې له بهر څخه وارد شوي کتابونو باندې مالیه ۵۰ سلنه کمه شوې ده.

د طالبانو حکومت په افغانستان کې د کتابونو په چاپولو مالیه له منځه وړې ده پداسې حال کې چې د لیکوالانو د ډېری کتابونو او اثارو په چاپ او پلور باندې محدودیتونه لګولي دي.

د طالبانو حکومت د هغو کتابونو سلګونه کاپي هم راټولې کړې دي چې د دوی په وینا د اسلامي او افغاني ارزښتونو سره په ټکر کې دي.

د کتاب ارزونې کمیسیون په خپلو غونډو کې د هغو کتابونو خپرولو او چاپ ته اجازه ورکوي چې د اسلامي او ملي ارزښتونو سره سم وي. د دې ادارې له اجازې پرته هېڅ کتاب د خپرولو اجازه نلري.

د طالبانو حکومت تر دې دمه په بېلابېلو سیمو کې ټول دولتي او خصوصي کتابتونونه معاینه کړي او د ګڼ شمېر کتابونو، خپرونو او ادبي او هنري اثارو وېش، پلور او شتون یې منع کړی دی چې د اسلامي او ملي ارزښتونو سره سم نه وو.