انصار: (د چنګاښ۱۶مه)،په کنړ ولایت کې د ۳۵ پراختیایي پروژو چارې پیل شوې.
دغه پروژې د کنړ په دانګام، شلتن، خاص کنړ، مرورې، سرکاڼو او ناړۍ ولسوالیو کې پیل شوې.
یادې پروژې د طالبانو حکومت د سرحدونو، قومونو او قبایلو چارو وزارت د مرستیال محمد اسماعیل غزنوي له لوري پرانیستل شوې دي.
د طالب چارواکو په وینا، د دغو ولسوالیو لپاره په ټولیز ډول د ۱۳۱میلیونه افغانیو په لګښت ۶۸ پروژې منظور شوي دي، چې پکې ښوونځي، مدرسې، کلیوالي پراختیا، اوبو، سړکونو، جوماتونو او نورو زیربنايي برخو ته پروژې ځانګړې شوې دي.
په دغو پروژو کې سلګونه ځوانانو ته د کار زمینه هم برابره شوه.
کونړ مېشتې د دې پروژو له پیل نه خوښي څرګندوي، خو تمه لري چې قراردادي شرکتونه باید په ښه کیفیت کار وکړي.
دوی له طالبانو غوښتنه کوي چې د پروژو له چارو منظمه لیدنه وکړي، څو پر وخت او ښه کیفیت بشپړې شي.
دا پروژې د کنړ ولایت هغو ولسوالیو کې پیل شوې، چې د ډیورنډ فرضي کرښې ته نېږدې موقعیت لري.
