انصار: (د چنګاښ۹مه)، ټولګټو چارو وزارت وایي چې د روان کال د غبرګولي میاشتې له پیله تر پایه د یاد وزارت د اوسپنې  پټلۍ له لارې ۳۱۲ زره ۳۹۷ مټریک ټنه انتقالات شوي دي.

د دې وزارت د خبرپاڼې له مخې: د حیرتان بندر له لارې (۲۴۲۳۵۷) ټنه، د آقینې بندر له لارې (۱۶۷۶۰) ټنه، د تورغونډۍ بندر له لارې (۲۲۲۶۱) ټنه او د خواف-هرات له لارې (۳۱۰۱۸) ټنه، چې ټولټال (۳۱۲۳۹۷) ټنه نفتي، غیر نفتي او نور مواد دي، هېواد ته وارد او صادر شوي دي.

په خبرپاڼه کې ویل شوي چې د انتقالاتو له ډلې یوه برخه ټرانزيټ او صادرات دي، په جوزا مياشت کې (۴۸۸۹) ټنه ټرانزيټ او صادرات شوي، چې لویه برخه یې وچه مېوه، معدني ډبرې، کچالو، وريجې او د انارو جوس دي.

د ټولګټو چارو وزارت د معلوماتو له مخې هر څومره چې د اوسپنې پټلۍ له لارې د صادراتو او انتقالاتو کچه لوړيږي، په هماغه اندازه کاري فرصتونه برابریږي، ملي عواید زياتيږي او په ټوله کې اقتصادي ثبات، ترقۍ او ځان بسياينې ته لاره هواریږي.

یاد وزارت د لا زیاتو انتقالاتو لپاره د مناسبو شرایطو پر برابر او سوداگرو ته د اسانتیاوو د چمتو کولو په برخه کې د هڅو د پراخېدو ډاډ ورکړی او زیاته کړې یې ده چې دوی به د ملي عوايدو د زياتوالي په موخه د ريل پټلۍ له لارې د سوداګریزو توکو د لیږد-رالیږد بهیر روان او چټک وساتي.