انصار: (د غويي۲۷مه)، د ملګرو ملتونو د وګړو د صندوق (یو ان اف پي اې) اجرایوي مرستیال خبرداری ورکړی چې د امریکا د ۱۰۲ میلیون ډالرو مرستې کمېدل به ۶،۹ میلیونه افغان ښځې او ماشومان له روغتیايي خدمتونو بې برخې کړي.

اندریو سربوتون اعلان کړی چې د دغو مرستو په بندېدو سره به د ملګرو ملتونو د وګړو د صندوق له ملاتړ برخمن ۹۰۰ روغتیايي مرکزونو نه ۵۰۰ یې وتړل شي.

نوموړي په نیویارک کې د ملګرو ملتونو په مرکزي دفتر کې د افغانستان څو ولایتونو ته د خپل وروستي سفر په اړه خبریالانو ته وویل:

ما د نړۍ په ترټولو لوی بشري ناورین کې د ملګرو ملتونو د وګړو صندوق ته د بودجې د لوی کمښت ویجاړونکي اغیزې لیدلي او درک کړي دي ، یو داسې ناورین چې ممکن د خبرونو سرټکي نه وي، خو دغه شان د نړۍ یو لوی اضطراري حالت پاتې دی.

نوموړي زیاته کړې چې په دې سفر په ترڅ کې يې په کابل، باميانو او د افغانستان او پاکستان تر منځ په سرحدي سيمو کې د ملګرو ملتونو له ملاتړ برخمنو روغتيايي مرکزونه لیدلي دي.

سربوټون څرګنده کړې چې امریکا په دې وروستیو کې د ملګرو ملتونو د وګړو صندوق لپاره خپله نړیواله بودیجه نږدې ۳۳۰ میلیونه ډالره کمه کړې، چې ۱۰۲ میلیونه ډالر یې افغانستان ته ځانګړي شوې وه.

نوموړي ویلي چې د دې بودجې ډیره برخه د کورنیو روغتیایی خدمتونو، ګرځنده روغتیایی پاملرنو، اړین رواني- ټولنیز ملاتړ او په نړۍ کې د میندود مړینې ترټولو لوړې کچې ته په کتو په یاد هیواد کې د حیاتي خدمتونو چمتو کولو لپاره په پام کې نیول شوي وه.

دا اندیښنې وروسته له هغه دي چې د متحده ایالاتو ولسمشر ډونالد ټرمپ په جنورۍ میاشت کې د ۹۰ ورځو لپاره د متحده ایالاتو ټولې بهرنۍ مرستې وځنډولې او ویې ویل چې د دې مرستو بیوروکراسۍ د امریکا له ګټو سره سمون نه لري.

د روغتیا نړیوال سازمان (ډبلیو اچ او) او همکارې ادارې یې د روغتیا نړیوال کلسټر چې له څو نړیوالو بنسټونو جوړه شوې شبکه ده، هم په دې وروستیو کې په جلا جلا راپورونو کې ویلي چې د امریکا د دولت له لوري د مرستو د بشپړ بندولو امر په افغانستان کې د شاوخوا ۷۰۰ روغتیايي مرکزونو د فعالیتونو د ځنډولو یا تړلو لامل شوی دی.

بل خوا د ملګرو ملتونو د بشري چارو د همغږۍ دفتر (اوچا) مخکې ویلي وو چې که یوازې ۲۵ سلنه بودجه یې ورکړل شي، د ۹،۳ میلیونو وګړو له ډلې به ۷ میلیونه یې چې روغتیايي خدمتونو ته اړتیا لري، له دغو خدمتونو بې برخې شي.

اوچا زیاته کړې چې د بودجې په کمېدو سره به د ۲۰۲۵ تر پایه په افغانستان کې له ۱،۹۰۰ ډیر روغتیایی مرکزونه وتړل شي.