انصار: (د غویی۱۵مه)، په داسې حال کې چې د سالنګونو په ګډون، په بېلابېلو ولایتونو کې نن هم د سختو بارانونو او سیلابونو د راوتلو اټکل شوی، د طالبانو د حکومت له پېښو سره د مبارزې د چمتوالي ملي اداره وايي، په شمال‌ختیځ زون کې وروستیو سیلابونو خلکو ته درانه مالي او ځاني زیانونه اړولي دي.

د دې ادارې ویاند حافظ محمد یوسف حماد، په یو غږیز پیغام کې د یادې ادارې په ایکس/پخواني ټویټر پاڼه خپور شوی، ویلي چې د دغو سیلابونو له امله ۲ تنه مړه شوي او ۳ نور ټپیان شوي دي.

هغه ویلی:د لومړنیو راپورونو له مخې یو شمېر استوګنیز کورونه، سړکونه، کرنیزې ځمکې یا زیانمن شوي او یا هم له منځه تللي دي. له بده مرغه، د دغو سیلابونو له امله دوه تنه هېوادوال هم شهیدان شوي او درې نور ټپیان شوي دي.

نوموړي د کوم ځانګړي ولایت نوم نه دی اخیستی، خو په شمالي ولایت بدخشان کې، د طبعي پېښو سره د مبارزې ادارې رییس مولوي محمد اکرم اکبري بیا کورنیو رسنیو ته ویلي، چې سیلابونو د دغه ولایت په بهارک ولسوالۍ کې د ۵ تنو ژوند اخیستی او ډېر مالي تاوانونه یې اړولي دي.

تر دې وړاندې، په بدخشان کې له پېښو سره د مبارزې د ریاست د پېښو امر محمد کامګار ویلي و، چې د جمعې د ورځې سیلابونو د بدخشان په جرم او بهارک ولسوالیو کې کورونه، کرنیزې ځمکې او بڼونه ویجاړ کړي دي.