انصار: (د غويي ۱۴ مه)، د پاکستان او هند تر منځ د کړکېچ له امله دا مهال د افغان سوداګرو لسګونه کانټینرونه چې بايد هند ته اوښتي وای يا له هند څخه پاکستان ته رسېدلي او بايد افغانستان ته واوړي، اوس پاکستان کې درول شوي دي.

د پاکستاني ډان ورځپاڼې د راپور له مخې، ټاکل شوې وه دغه کانټينر د واګه بندر له لارې هند ته داخل شي او له هند څخه را روان شوي کانټينر د تورخم او چمن له لارو افغانستان ته داخل شي، خو اوس په کراچۍ، تورخم او چمن کې درول شوي او له نامعلوم سرنوشت سره مخ دي.

په دې راپور کې د افغانستان او پاکستان د ګډې سوداګريزې خونې د مشر خانجان الکوزي له قوله ويل شوي، په دغو کانټينرونو کې وچه ميوه، سبزيجات او نور توکي بار دي.

له هند څخه افغانستان ته د رسېدو په هدف ۱۵۰۰۰ کانټینره توکي کراچۍ بندر ته رسېدلي، چې لسګونه لارۍ يې بار شوي، خو دا مهال په تورخم او چمن کې ولاړې دي.

پاکستان سره د اپټا تړون پر اساس، افغانستان حق لري کراچۍ او ګوادر بندر د سوداګرۍ لپاره وکاروي. دغه تړون په ۱۹۶۵ کال کې لاسليک شوی او په ۲۰۱۰ کال کې پرې بيا کتنه شوې ده.