په غزني ولايت کې د یونیسف لخوا د محلي موسسو په همکارۍ د ابتدايي زده کړو پر مخ وړل کېدونکي محلي پروګرام يوه برخه وتړل شوه.

په دې پروژه کې يوې بوختې سرچينې تائيد کړی، چې د دغه محلي پروګرام د بندېدو له وجې په ۴۰۰ ټولګيو کې شاوخوا ۱۲ زره ماشومان (نجونې او هلکان - تر پنځم ټولګي پورې) له زده کړو محروم او لسګونه ښوونکي بې کاره شول.

داسې معلومات شته، چې له ولسواليو څخه قومي مشران او مخور غواړي د دغه پروګرام د غځولو په موخه پوهنې وزارت سره د خبرو لپاره کابل ته ولاړ شي، خو په يو غږيز پيغام کې چې زاویه نیوز ته رسېدلی، د غزني د پوهنې رييس په ولسواليو کې خپلو امرينو ته لارښوونه کوي، چې له دغو قومي مخورو سره له هر ډول همغږۍ او همکارۍ ډډه وکړي.