انصار: ( د کب ۲۳مه)؛ د ملګرو ملتو د مخدره موادو او جرمونو اداره( یو این او ډي سي) وایي چې په ۲۰۲۴ کال کې په افغانستان کې د اپیومو د یو کیلو قیمت ۷۵۰ امریکایي ډالرو ته ورسیده.

یو این او ډي سي په جینوا کې د یوې غونډې پرمهال چې په افغانستان کې د نشه اي توکو مسالې ته ځانګړې شوې وه دا خبر هم ورکړ چې په افغانستان کې د طالبانو له لورې د کوکنارو پر کښت تر بندیز مخکې مودې په پرته دا قیمت لس برابره لوړ دی. په ۲۰۲۲ کال کې یو کیلو تریاک په افغانستان کې په ۷۵ امریکایي ډالره خرڅیدل.

د ملګرو ملتو د مخدره موادو او جرمونو د ادارې د راپور له مخې د کوکنارو د کښت تر بندیز وروسته د اپیومو قاچاق کم شوی دی، خو دې ادارې په ورته وخت کې دا اندیښنه څرګنده کړې ده چې د تریاکو لوړ قیمت د دې سبب شوی دی چې لاهم په افغانستان کې له دې درکه قاچاق کوونکي ډیره ګټه ترلاسه کړي. دې ادارې په خپل راپور کې دا ویلي دي چې په ۲۰۲۲ کال کې د افغانستان د زیرمه شویو تریاکو اندازه ۱۳۲۰۰ ټنه اټکل شوې وه چې ویل کیدل تر ۲۰۲۷ کال پورې دا زیرمه د بازار تقاضا پوره کولی شي.

د یو این او ډي سي اجراییوي رییسې بیا دغه غونډې ته وړاندیز وکړ چې له مخدره موادو سره د مبارزې لپاره یوې همهغږې ستراتیژۍ ته اړتیا شته، داسې ستراتیژۍ ته چې قاچاقي شبکې په نښه کړي او په داسې ډول یې له منځه یوسي چې د افغان بزګرانو د ژوند د ښه کیدو لپاره پانګونه وشي او په دې ډول په افغانستان او د افغانانو لپاره د اوږدې مودې په مخه ثبات تامین شي.

د یو این او ډي سي د راپور له مخې مخکې تر دې چې په افغانستان کې د کوکنارو کښت کم شي هلته د افیومو د شته زیرمو قیمت له څلور اعشاریه شپږو تر پنځه اعشاریه نهه میلیاډه ډالرو پورې اټکل شوی و چې د کورني ناخالص تولید له درویشتو تر نهه ویشت فیصدو پورې یې په ۲۰۲۳ کال کې جوړوله.