انصار: (د چنګاښ ۱۹ مه)، له ماشومانو څخه د ملاتړ نړیوال صندوق ( یونیسف) په یوه تازه راپور کې ویلي، چې د طالبانو تر واک لاندې افغانستان کې تر ۴۰ سلنې پورې ماشومان په رواني ناروغیو اخته شوي.
د دغې ادارې د موندنو له مخې، له دې ډلې تر ۲۴ سلنې پورې ماشومان چې عمرونه یې له ۵ تر ۱۷ کلونو دي، د شدید اضطراب وضعیت سره مخ شوي.
له شپږم ټولګي څخه پورته زده کړو ته د نجونو نه پرېښودل د دغو رواني ناروغیو یو مهم دلیل یاد شوی.
سربېره پر دې د جګړې دوام، کډوالي، بې وزلي او د ناچاوده توکیو د چاودنو دوام او وېره د دغه وضعیت له نورو لاملونو ګڼل شوي.
د طالبانو رژیم په دې اړه څه نه دي ویلي، خو معمولاً داسې خبرونه ردوي او د دوی له واکمنۍ راهیسې د افغانستان په وضعیت کې د مثبتو بدلونونو ادعا لري.
تر دې مخکې یو شمېر نورو نړیوالو بنسټونو هم د طالب واکمنۍ له بیا پیل راهیسې په افغانستان کې د رواني او نورو ناروغیو د زیاتوالي خبرونه ورکړي او د دغې واکمنۍ افراطي قیودات او عملونه یې یو مهم لامل ګڼلی.
