انصار: (د غبرګولی۳۰مه)، د اطلاعاتو او کلتور وزارت مسوولان وایي چې اوسمهال په ټول هېواد کې شاوخوا ۳۷۰ بېلابېلې رسنۍ فعاليت لري.

د یاد وزارت نشراتي  معین، حیات الله مهاجر فراهي ویلي په دغو رسنیو کې انځوریزې، غږیزې، خبري آژانسونه او چاپي رسنۍ شاملې دي چې شمېر یې شاوخوا ۳۷۰ ته رسېږي. 

مهاجر فراهي همداراز ویلي چې د رسنیو ستونزو ته تر ډېره رسېدنه شوې او تر هېڅ ډول فشار لاندې نه دي. 

د اطلاعاتو او کلتور وزارت نشراتي معین همداراز ویلي چې دا وخت رسنۍ په ټول هېواد کې د اسلامي او ملي ارزښتونو او افغاني کلتور ته په پاملرنې د فعالیت اجازه لري.

د ښاغلي فراهي په وینا، دوی کولای شي په هېواد کې خپل رسنیز فعالیتونه روان وساتي؛ البته ځينې نقاط دي چې، هغه باید ټول په پام کې ونیسو، اسلامي ارزښتونه د هېواد علیا منافع، زموږ د افغانې ټولنې دود او فرهنګ.

دا په داسې حال کې ده چې په افغانستان کې د جمهوري نظام له نسکورېدو وروسته سلګونه غږیزو، تصویري او چاپي رسنیو فعالیت بند کړ چې یو لامل یې اقتصادي ستونزې بلل شوې دي.