انصار: (د غویی9مه)، د ننګرهار عامې روغتیا ریاست د بیړنیو پېښو امبولانسونو د دوو مېرمنو په ګډون ۵ تنه ټپيان او یو جسد حوزوي روغتون ته انتقال کړي دي.

د ننګرهار ولايت مقام وايي، چې پرون (شنبه، د غوايي ۸مه) د ورښتونو په پايله کې د جلال اباد ښار واټونو کې اوبه راووتلې او خلک يې له ګڼو ستونزو سره مخ کړل.

سرچینې ويلي، د پرونيو سېلابونو له کبله په سیاسنګ ښارګوټي کې دیوال راغورځيدلی چې ۲ تنه ټپيان یې حوزوي روغتون ته راوړي یوه ۶ کلنه ماشومه او بله ۶۰ کلنه مېرمن ده.

په ورته مهال ‏د جلال آباد ښار لومړۍ ناحيې اړوند اميد آباد سيمه کې د سرې مياشتې ژغورنې ټيمونو له لوري لسګونه کورنۍ د سيلابونو او اوبو له خطره ژغورل شوې دي.

ويل کيږي دغه کورنۍ د سرې مياشتې ښوونيز مرکز او کلينيک ته انتقال شوې، چې هلته د لنډمهالې سرپناه سربيره درمل او خواړه ورکړل شول.

‏د ژغورنې په دې عملياتو کې د افغاني سرې مياشتې مسوولانو، BDRT ټيمونو او رضا کارانو برخه اخيستې وه.

دا په داسې حال کې ده چې پرون په سرپل کې هم د ورښتونو له امله د يو کور چت نړېدلی چې له امله يې اتو تنو ته مرګ ژوبله اوښتې ده.