انصار:( د مرغومی ۲۳ مه)،  د «وزیرستان؛ وروستی تم ځای» اثر لیکوال نذیر احمد سهار خبر ورکړی چې د طالبانو رژیم یې د افغانستان په کتابپلورنځیو کې د کتاب پر پلورلو بندیز لګولی.

د ښاغلي سهار په وینا، د طالبانو په اطلاعاتو او فرهنګ وزارت کې سرچینو ورته ویلي چې د واکمن رژیم لخوا د «ممنوعه کتابونو» یو نوملړ برابر شوی، چې تر سلو پورې کتابونه پکې شامل دي.

یو شمېر افغان فعالانو او لیکوالو د طالبانو پر دغه ادعا شوي عمل توندې نیوکې کړي او ویلي، چې دا ډول کړنې به نه یوازې د طالبانو پر سلیقه د نابرابرو کتابونو مخه ونه نیولی شي؛ بلکې لا به یې قوت او مینه وال زیات کړي.

د طالبانو له بیا واکمنیدو سره، دوی د کتابونو، رسنیو او فکري فعالیتونو په اړه سخت قیودات لګولي.

طالب چارواکو د دغه تازه خبر په اړه څه نه دي ویلي، خو تر دې مخکې یې د خپلو ورته کړنو دفاع کړې ده.