افغاني سرې میاشتې ټولنه په هرات کې د پرونۍ زلزلې له کبله سلګونه کسانو ته د مرګ ژوبلې اوښتو خبر ورکوي.
د دې ټولنې پر ایکس پاڼه لیکل شوي چې په پرونۍ زلزله کې تر اوسه د ۴۰۰کسانو مړینه تایید شوې او په خبره یې، دا وروستۍ شمېرې نه دي او کېدایشي د مړو شمېر نور هم لوړ شي.
په دې زلزله کې د سلګونه نورو کسانو د ټپي کېدو خبر ورکړل شوی دی.
پرونۍ زلزلې د هرات په زنده جان ولسوالۍ کې ۱۲کلي سخت زیانمن کړي دي.
د یادې ټولنې خبرپاڼه زیاتوي چې د دوی کاري ټیمونه سیمې ته رسېدلې او زیانمنو شویو کورنیو ته یې لومړنۍ مرستې رسولې دي.
د طالبانو حکومت ویاند ذبیح الله مجاهد هم د اعلامیې په خپرولو سره ویلي چې ټولو خدمتي او نظامي ارګانونو ته هدایت شوی چې ژر تر ژره په هرات ولایت کې زلزله ځپلو سیمو ته ځانونه ورسوي او روغتونونو ته د ټپیانو د لېږد لپاره هر ډول امکانات برابر کړي.
ده زیاته کړې چې د خوراکي توکو او خلکو ته د سرپنا برابرولو په برخه کې دې بیړني اقدامات وشي.
