انصار: (د تله 10 مه)، د افغانستان د اطلاعاتو او فرهنګ وزارت د ځوانانو معینیت لپاره د طالبانو د رژیم واکمن یونس راشد وایي، چې د افغان ځوانانو د « فکري او اقتصادي اصلاح» لپاره یې طرحه جوړه کړې او خپل لوی مشر ملا هبت الله ته استولې ده.

د هغه په وینا، دغه طرحه به زر د نوموړي لخوا تایید او د عملي کیدو امر یې وشي.

په دغه طرحه کې د ولسوالیو په کچه د ځوانانو د استازو ټاکل، د هېواد په کچه د ځوانانو انسجام، د دوی د افکارو بدلون او ورته د تعلیمي فرصتونو رامنځته کول شامل ښودل شوي.

دا په داسې حال کې ده، چې طالبان د ټاکنو خلاف دي او هغه څه، چې دوی یې د ځوانانو د افکارو اصلاح بولي، منتقدان یې پر افراطیت د ځوان نسل د ورګډولو خطرناکه هڅه یادوي.

د طالبانو له بیا واکمنیدو سره دوی په پرله پسې ډول ادعا کړې، چې د جمهوري نظام پر مهال بهرنیانو د خلکو ذهنونه او افکار منحرف کړي، خو د طالبانو یو شمېر منتقدان دا ډول څرګندونې افغانانو ته سپکاوی بولي او وایي طالبان څرګندوي، چې د بدلیدو د ټولو تبلیغاتو برعکس یې دوی بدل شوي نه دي او د پخوا په شان له فکري تنوع سره مخالف دي.