سفارت افغانستان در توکیو، پایتخت جاپان اعلام کرده‌است که پس از 31 جنوری سال 2026 فعالیت خود را تعلیق می‌کند.

به گزارش انصارپرس؛ در اعلامیهٔ سفارت افغانستان در توکیو آمده‌است که این تصمیم، پس از مشورت‌ها، از سوی وزارت خارجۀ جاپان اتخاذ گردیده و بعد از 31 جنوری سال 2026 تمام فعالیت‌ها و خدمات سفارت، از جمله فعالیت‌های سیاسی، اقتصادی، فرهنگی و کنسولی، تا اطلاع ثانوی تعلیق خواهد شد.

اعلامیه می‌افزاید، این تصمیم در هماهنگی نزدیک با مقامات جاپانی و با درنظر‌داشت کنوانسیون روابط دیپلوماتیک وین 1961 اتخاذ شده‌است.

سفارت افغانستان نوشته که دولت جاپان مطابق به کنوانسیون وین، مصونیت محل مأموریت (سفارت، ملکیت و آرشیف) را همچنان محترم شمرده و به حفظ آن ادامه خواهد داد.

در اعلامیهٔ از افغان‌های مقیم آن‌کشور خواسته شده تا در صورت نیاز عاجل به خدمات کنسولی، قبل از 31 جنوری 2026 به بخش کنسولی سفارت مراجعه کنند.

وزارت امور خارجۀ حکومت طالبان تا کنون در این باره چیزی نگفته‌است.