سخنگوی حکومت طالبان امروز از تعیینات جدید در شماری از ادارات خبر داده است.

به گزارش انصار، ذبیح الله مجاهد، سخنگوی حکومت طالبان در صفحه ی اکس اش نوشته است که براساس حکم شیخ هبت الله اخندزاده رهبر طالبان، معین خط آهن وزارت فواید عامه، ملا بخت الرحمن شرافت بحیث معین مالی و اداری وزارت صحت عامه، معین مالی و اداری قبلی وزارت صحت عامه، مولوی محمد اسحاق صاحب زاده بحیث معین خط آهن وزارت فواید عامه و والی پیشین ولایت کندز، ملا نثار احمد نصرت بحیث معین انکشاف دهات وزارت احیا و انکشاف دهات تعیین گردیده است.

سخنگوی حکومت طالبان همچنان بیان کرده است که براساس این حکم، قوماندان پیشین قول اردوی ۲۰۵ البدر، ملا محمدخان دعوت بحیث والی ولایت کندز و ولسوال قبلی ولسوالی گرشک ولایت هلمند، مولوی حیات الله مبارک بحیث والی ولایت غور، والی پیشین ولایت غور، ملا احمدشاه دین دوست بحیث قوماندان قول اردوی ۲۰۵ البدر، رئیس قبلی منابع بشری وزارت زارعت، آبیاری و مالداری، مولوی عبدالولی بحیث قومندان امنیهٔ ولایت جوزجان، ولسوال قبلی ولسوالی موسی قلعهٔ ولایت هلمند، ملا عبدالسلام حسینی بحیث قومندان امنیهٔ ولایت کاپیسا، آمر امنیت قبلی قومندانی امنیهٔ ولایت بادغیس، حاجی نورآقا حیدر بحیث قومندان امنیهٔ ولایت غور تقرر یافته است.

مجاهد افزوده است، که قوماندان امنیهٔ قبلی ولایت جوزجان، قاری حفیظ الله پهلوان بحیث آمر امنیت قوماندان امنیهٔ ولایت بادغیس ، رئیس معارف پیشین ولایت ننگرهار، مولوی عزیزالله مصطفی بحیث معاون والی همین ولایت، قوماندان امنیهٔ قبلی ولایت کاپیسا، حاجی محمدعثمان بحیث رئیس منابع بشری وزارت زراعت، آبیاری و مالداری و معین مالی و اداری قبلی وزارت امور خارجه، مولوی رحمت الحق فضیل بحیث عضو دارالافتاء مرکزی تعین شده اند.