امام علی رحمان؛ رییس جمهوری تاجیکستان دستور داده است تا ۲۰ هزار نیروی دیگر به مرز افغانستان اعزام شوند.

گزارش شده که شورای امنیت ملی تاجیکستان دیروز (دوشنبه، ۱۴سرطان/تیر) تحت ریاست امام علی رحمان تشکیل جلسه داده و وضعیت در مرز این کشور با افغانستان را بررسی کرده است.

در این جلسه رجبلی رحمان علی؛ فرمانده نیروهای مرزی و رمضان رحیم زاده؛ وزیر داخله (کارهای داخلی) تاجیکستان در باره وضعیت در مرز تاجیکستان با افغانستان گزارش داده اند.

در این جلسه امام علی رحمان؛ رییس جمهوری تاجیکستان که فرمانده کل نیروهای مسلح این کشور است، به وزیر دفاع دستور داده تا برای تحکیم مرز تاجیکستان با افغانستان ۲۰ هزار نیروی ذخیره اعزام کند.

این در حالی است که طالبان با تشدید حملات شان، ده ها ولسوالی را در شمال و شمال شرق گرفته اند.

سقوط ولسوالی های مرزی در شمال افغانستان، نگرانی روسیه و کشورهای آسیای میانه را برانگیخته است.

در این زمینه، رییس جمهوری تاجیکستان امروز با همتایان قزاقستانی و ازبکستانی خود گفتگو کرده است.

همزمان کاخ کرملین از گفتگوی تلفونی ولادیمیر پوتین؛ رییس جمهوری روسیه با امام علی رحمان؛ همتای تاجیکستانی اش خبر داده و گفته که دو طرف در این گفتگو درباره وضعیت مناطق مرزی تاجیکستان و افغانستان بحث کرده اند.

طبق اعلامیه دفتر ریاست جمهوری روسیه، پوتین بر آمادگی روسیه برای ارائه کمک های لازم به تاجیکستان در برابر تهدیدات امنیتی تاکید کرده است.